Elmaze Nura është ndër regjisoret më të mira që ka Kosova. Ajo deri tani ka bërë regjinë e disa shfaqjeve, si “Ku...çka”, “Lisistrata”, “Trojanët”, “Çifti i hapur”, etj. Po ashtu shfaqjet e saj kudo ku kanë marrë pjesë janë shpërblyer me çmime të rëndësishme. Në një intervistë për portalin Bebaime, Elmaze Nura, flet për familjen e saj.

Bebaime: Eli Nurën e njohin të gjithë si regjisore shumë të suksesshme të disa shfaqjeve teatrale. Mirëpo, publiku di pak për jetën private të Elit. Mund të na thoni disa fjalë se nga kush përbëhet familja e Elmazes?

Elmaze Nura: Familja ime përbëhet nga unë, Blerimi dhe dy fëmijët tanë Glauku dhe Janina.

Bebaime: Para disa ditësh sërish keni sjellë në jetë një fëmijë tjetër. Na tregoni me disa fjalë për vajzën, kur ka lindur dhe ku?

Elmaze Nura: Vajza jonë të cilin e kemi pagëzuar më emrin Janina, ka ardhur në jetë më 17 Mars, ditën e martë në orën 08:50 të mëngjesit në QKUK. Dua të them se nën përkujdesin e mjekëve të kësaj klinike kam kaluar në mënyrën më të mirë të mundshme. Ata që ishin më mua në lindje, mjekët dhe motrat dua ta falënderoj pa masë. Një falënderim i veçantë shkon për doktoreshën, Myrvete Paçarada.

Bebaime: Pas një periudhe të gjatë keni sjellë në jetë Janinën. Na tregoni se çfarë emocioni është që të kesh edhe një vajzë, pas kaq vitesh?

Elmaze Nura: Për gati dhjetë vjet ne kemi pasur si fëmijë të vetëm Glaukun. Ai na ka dhuruar shumë dashuri dhe lumturi përgjatë gjithë këtyre viteve. Aq të plotësuar kemi qenë saqë duket se nuk e kemi ndjerë nevojën e një fëmije tjetër në familje, por me kalimin e kohës e sheh se vetëm një është pak. Janina ka ardhur si dëshirë që Glauku të këtë një motër ose vëlla. Por, për më shumë se kaq, të pasurit edhe i një fëmije tjetër është gëzim i madh. Është ndjenjë që po të provoj ta përshkruaj vetëm do t’i humbas magjinë. Ai momenti i ardhjes në jetë të Janinës, momenti i takimit të parë, mbajtja në dorë e pastaj të gjitha kontaktet më fëmijën nuk mund të përshkruhen ndryshe përveç se dhuratë që Zoti ta jep. Kur e kam sjell në jetë Glaukun, me 25 maj 2005, ka qenë dita më e lumtur e jetës sime. Po, ajo lumturi më është përsëritur më Janinën. Para dhjetë vjetësh kam qenë më e re dhe ndoshta edhe nuk kam qenë plotësisht e vetëdijshme për mrekullinë e quajtur fëmijë. Për Janinën jam shumë më e përgatitur dhe po e shijoj çdo moment që po e kaloj më të.

Bebaime: Duket se vajza e ka kompletuar familjen tuaj?

Elmaze Nura: Siç e thash më herët, bashkë me Blerimin donim që Glaukun të mos e linim pa motër ose vëlla. Për mua edhe të qenit djalë do të ishte i mirëseardhur, por të qenit vajzë e ka kompletuar mozaikun e familjes. Në kultura të ndryshme thuhet se kur ke djalë dhe vajzë, Zoti të ka falë botën.

Bebaime: Siç e përmendet edhe më lartë keni edhe një djalë, Glaukun, i cili shkon në shkollë. Mund të na flisni më shumë për Glaukun, në cilën shkollë shkon?

Elmaze Nura: Glauku në maj mbush 10 vjet. Shkon në klasën e IV në shkollën “Mileniumi i Tretë”. Po ashtu po studion klarinetën, në Shkollën e Ulët të Muzikës “Prenk Jakova”, në Prishtinë. Mëson shumë mirë dhe mbi të gjitha është një fëmijë i mbarë. Unë lutem që të rritet i shëndetshëm, i mençur, i dashur dhe edukuar ashtu sic e është.

Bebaime: Si e ka pritur, Glauku ardhjen e një anëtari tjetër në familjen tuaj?

Elmaze Nura: Glauku që nga marrja e lajmit për shtatzëni, ka qenë shumë i lumtur. Nuk e kam menduar se do ta priste ardhjen e Janinës si diçka të tillë. Gjatë periudhës së shtatzënisë, sa herë është afruar të më përqafoj mua, nuk ka ndodhur që të mos i flasë edhe Janinës. E që dy javë ai mezi po pret të vijë në shtëpi nga shkolla, meqë Janina tashmë është në mesin tonë. Glauku po provon që ta shfaq vetën si të dobishëm në përkujdesin që po i duhet Janinës dhe për çdo moment shfaq gatishmërinë për të ndihmuar.

Bebaime: Glauku ka trashëguar pjesë nga profesioni juaj?

Elmaze Nura: Glauku ka “asht artisti”. Ai ka luajtur në filmin “Heroi”, ku pa drojë do të them se ishte i mrekullueshëm. Po këto lëvdata i ka marrë nga të gjithë ata që e kanë parë filmin. Ka luajtura edhe në filma të metrazhit të shkurtër. Po ashtu edhe në dy shfaqje të mia ka luajtur në Teatër. Glauku, është shumë i natyrshëm në teatër dhe film, merr pjesë edhe në aktivitetet artistike të shkollës. Ai ka një zë të bukur dhe e do shumë muzikën. Në anën tjetër është edhe në kursin e karatesë. Por, pavarësisht aktiviteteve të tij, unë dua që Glauku ta zgjedhë rrjedhën e jetës së tij, pa i imponuar drejtim.

Bebaime: Po bashkëshorti sa ju ndihmon rreth fëmijëve?

Elmaze Nura: Blerimi është një bashkëshort dhe baba shumë i kujdesshëm. Është gati të marr përsipër pjesën e kujdesit që i takon. E kam pasur krah edhe në familje, edhe në profesion. Ai më ka lehtësuar detyrat dhe përgjegjësitë e mia, dhe më ka bërë të ndjehem mirë si grua, nënë, regjisore dhe profesoreshë.

Bebaime: Na përshkruaj me disa fjalë si jeni ndjerë në momentin kur e keni kuptuar se do të bëheni sërish nënë pas nëntë vitesh?

Elmaze Nura: Është një lajm sa i pritur aq edhe i papritur. Është e pamundur të ngjitesh menjëherë dhe të fluturosh nga gëzimi. Trurit i duhet pak kohë për të procesuar një lajm kaq të madh. Por, me kohë, ditë pas ditë e kupton se diçka e madhe po ndodh më organizmin tënd, që si rrjedhojë do të këtë efekt në gjithë jetën tënde. Çdo ditë je më e sigurt në mrekullinë që po rritet brenda teje.

Bebaime: Çfarë ndjesi është kur fëmijët të thërrasin nënë?

Elmaze Nura: “Nënë”, kjo fjalë magjikë që shkrin gjithçka. Një femër ka shumë role gjatë jetës së saj, atë të vajzës, të gruas, të motrës, por mbi të gjitha qëndron roli i nënës. Nëna, është mishërim i dashurisë dhe kujdesit në rritjen e fëmijëve të saj. Përpjekja që të ushqejë fëmijën e saj me një dashuri të pakrahasueshme është thelbi i amësisë.

Bebaime: Cila është këshilla juaj për nënat dhe gratë që janë shtatzëna?

Elmaze Nura: Shtatzënia nuk është proces i lehtë. Trupi dhe mendja i nënshtrohen shumë ndryshimeve, por të menduarit pozitiv, qetësia dhe dëshira e madhe për të pasur në krah atë qenie që rritet brenda trupit tënd është më e madhe se sa çdo sfidë që të del para. Gra, merreni shtruar dhe gëzojuni faktit që ju do të bëheni nëna.

Bebaime: Sa kohë do ti mungojë Elmaze Nura publikut me shfaqjet e saj të mrekullueshme?

Elmaze Nura: Unë nuk e kuptoj të qenit nënë si privim për të ushtruar profesionin tënd. Fëmijëve të mi përpiqem që t’u jap gjithë dashurinë dhe kujdesin e botës, por nëse unë kam mundësi që të punoj, pse jo. Tek e fundit të qenit e plotësuar edhe në profesion të bënë të lumtur dhe kjo lumturi reflektohen në kujdesin e përditshëm në familje.

Intervistoi: TEUTA SINANAJ